النهارده عدي ٥ سنين علي تأسيس شركتي الخاصه في البرازيل

واللي فالصوره ده اول مقر اخدته هناك وكل ركن فيه شاهد علي تعب وشقي ومرمطة مستحيل تتنسي كنت بعمل كل حاجه واقف علي ايد كل ابره بتتعمل بنفسي وبعده نقلت لمقر كبير شفت فيه ايام جميله وأيام صعبه جدا وعمري ما انسي كم التعب اللي شفته عشان اقدر كمستثمر اجنبي اخد الخطوه دي هناك بسبب التعقيدات والروتين والبيروقراطيه وقانون العمل اللي اصعب ما يكون لدرجة اني فضلت سنه ونص عشان اقدر احصل علي إقامة مستثمر! وفالفتره دي كان لازم يكون للشركه ممثل قانوني امام الحكومه (شخص برازيلي او اجنبي مقيم بالدوله) وده هيكونله السلطه انه يسحب فلوس البنك او يقفل الشركه في أي لحظه وحاجات تانيه كتير طيب مين اللي وثقت فيه و اخترته!? الحقيقه مكنتش اعرف حد اثق فيه للدرجه الكبيره دي! ومكاتب المحامين الكبار الموثوق فيهم أسعارها خياليه بمعني الكلمه! فضلت محتاره جدا اعمل ايه? لحد ما قابلت بالصدفه سيده برازيليه عرفتها من خلال حضورنا مؤتمرات الاتحاد العالمي لسيدات الأعمال وسألتني بتعملي ايه هنا وحكيتلها قامت بنفس اللحظه ندهت لابنها اللي كان واقف منتظرها قالتله انت هتكون الممثل القانوني لشركة رشا (بالأمر كده) وقالتلي قدامه هيعمل ده بدون أي مقابل ,دبسته

واتضح انه مستشار قانوني ووالده قاضي وطبعا الست الجميله دي سيدة مجتمع عيله محترمه جدا وتشرف ربنا رزقني بيهم..

ده بقي توفيق ربنا يرزقكم من حيث لا تعلمون, تبقي واخد الخطوه ومجازف لوحدك في بلد غريب ملجأتش لأي حد من الوسطاء البرازيليين المعروفين في مجالي عشان محدش يتحكم فيا ولا يشتغلني وانا من الأساس رايحه أسس شركه هناك عشان اخلص من غشهم! وماشيه بقول يارب وتتحل من صدفه مكنتش تتخيلها! هيا دي تدابير ربنا اللي عقلك مهما فكر ميوصلهاش مبتجيش غير من عند الرزاق الكريم

فيه تفاصيل كتير اوي حصلتلي هناك ربنا وراني فيها عجائب قدرته وحتي الابتلاء اللي شفته وقت ما نقلت مقر كبير واتسرقت كل البضاعه وراح مني نص شقي عمري ودخلت في مشكلة نقص منتجات وازمه ماديه كبيره ربنا عوضني بعد صبري خير وشفت بعيني يعني ايه تبقي ماشي في معية الله بتاخد الخطوه وربنا بيسرلك امورك،

حقيقي من كان الله معه فمن عليه!?

بفتخر اني اول سيده عربيه والوحيده المصريه اللي قدرت تكون مستثمر في البرازيل .. ودي مقالات الغرفه البرازيله والسفاره المصريه عني

اللهم لك الحمد حتي ترضي حمدا يليق بك وبعظيم سلطانك.